🛑 هبوط السكر عند الأطفال.. المشكلة اللي بتقلق كل أم وأب!
هبوط السكر مش مجرد رقم بيظهر على الجهاز! ده أكتر مضاعفات السكر انتشارًا عند الأطفال والمراهقين اللي عندهم النوع الأول، وكمان بعض الأطفال المصابين بالنوع التاني لو بياخدوا إنسولين أو أدوية زي الـ أماريل والديامكرون وأخواتهم. 👶💉
▪️ إيه ده؟ 🤔
ده ببساطة لما مستوى السكر في الدم ينزل عن الطبيعي، وغالبًا بيكون أقل من 70 mg/dL. المشكلة إن السكر هو مصدر الطاقة الأساسي للمخ والجسم، فلو قلّ، الجسم بيبدأ ينهار! 😵
👀 طب إيه المشكلة الكبيرة في الهبوط؟
هبوط السكر هو أكبر عائق نفسي وجسدي قدام ضبط السكر عند الأطفال، لأنه ببساطة تجربة مخيفة جدًا! أي حد جرب الهبوط مرة، هيعيش في قلق دايم من تكراره، وده بيخلي ضبط السكر تحدي كبير للأهل قبل الطفل نفسه. 😨❌
⚠️ مين المسئول عن منع الهبوط؟
الطبيب + الأهل = فريق واحد! 🏥👨👩👧👦
لازم نتابع السكر باستمرار ونعالج أي هبوط بسرعة، وكمان نعرف إننا نقدر نوصل لسكر منتظم بدون هبوط متكرر! ✅
📌 معلومة غريبة لكن حقيقية!
مفيش رقم واحد يحدد الهبوط لكل الأطفال! 😲
- ممكن طفل يكون سكره 90 أو 100 ويحس بكل أعراض الهبوط!
- وطفل تاني متعود على سكر عالي 300، أول ما يبدأ يظبط سكره عند 180 يحس إنه بيهبط بشدة!
وده خلا التوصيات الجديدة تتكلم عن حاجة اسمها الهبوط النسبي، اللي لازم الأطباء يفهموه عشان ما يتهموش الطفل بالمبالغة! 🤯
🔴 طب إمتى نقلق؟
أي رقم أقل من 70 مجم (3.9 مليمول) هو إنذار خطر! 🚨
ولو الجهاز كتب "LO" يبقى السكر أقل من 20 مجم (1.1 مليمول) وده خطر جدًا وبيحتاج تدخل فوري! 😵
✨ ايه أسباب الهبوط المتكرر
أولًا: أخطاء بشرية ممكن تسبب هبوط السكر و ازاي تصلحها! 💉🚫
🔹 حقنت إنسولين طعام أكتر من اللازم؟ النتيجة؟ هبوط 🚨 الحل؟ اضبط معامل الكارب مع الطبيب! 👨⚕️
🔹 حقنت الإنسولين و نسيت تاكل؟ 😵💫 مشكلة شائعة عند مستخدمي الأكتربيد وهيومالين R.. الحل؟ اضبط منبه 📱 قبل الأكل!
🔹 أخدت إنسولين سريع لوجبة دهنية أو بطيئة الامتصاص؟ 😵 النتيجة؟ هبوط وبعده ارتفاع مفاجئ! الحل؟ استشارة الطبيب و تقسيم الجرعة ⏳
🔹 حقنت الإنسولين غلط في العضل؟ 🤕 يسبب امتصاص سريع جدًا و هبوط خطير.. الحل؟ حقن تحت الجلد بس (البطن، الذراعين، الفخذين، المؤخرة)! 🚫💉
🔹 بتاخد أدوية زي الميتفورمين أو تشرب قرفة؟ ممكن ترفع حساسية الإنسولين و تسبب هبوط! الحل؟ استشارة الطبيب قبل استخدام أي حاجة إضافية! 👩⚕️
🔹 الأطفال أحيانًا بيحقنوا نفسهم بجرعة زيادة علشان ياكلوا حلويات؟ 🍬😱 لازم متابعة دقيقة أو وضع علامة على القلم لمعرفة أي حقنة زائدة!
🔹 جهاز قياس السكر بيقرا غلط؟ ممكن يكون محتاج معايرة في المعمل! 🏥 أو نقطة الدم مش كافية على الشريط.. الحل؟ التأكد من القياس الصح! 📏
🔹 حقنت القاعدي و الطعام مع بعض؟ ⏳ بيعمل تداخل غير متوقع! الحل؟ فرق ساعتين بينهم!
🔹 حقنت في العضو اللي هتستخدمه في الرياضة؟ ⚽ مثلًا، الحقن في القدم قبل لعب كرة القدم بيسبب هبوط.. الحل؟ تجنب الحقن في العضو اللي هيكون نشط جدًا!
🔹 نسيت تقيس قمة الإنسولين القاعدي؟ ممكن تصحى بسكر 300 و تظبطه، لكن الحل الأفضل؟ ضبط القاعدي بشكل دقيق!
🔹 مجهود بدني قوي قبل أو بعد الحقن؟ بيأثر على السكر بشكل خطير! الحل؟ قياس السكر بعد الأكل بساعة و ضبط الجرعة!
🔹 نزلات البرد و ارتفاع الجرعة بدون استشارة الطبيب؟ بعض الناس سكرهم بينخفض بدل ما يرتفع! الحل؟ متابعة الطبيب! 👨⚕️
🔹 شهر العسل و عدم ضبط الجرعات؟ 🌿 فترة الهبوط المتكرر.. لازم تعديل الجرعات مع الطبيب!
🔹 مستخدمي الإنسولين المخلوط (نوفوميكس - مكستارد)؟ 🤯 عرضة للتأرجح بين الهبوط و الارتفاع! الحل؟ استشارة الطبيب لتغيير النوع!
🔹 الاستحمام بمياه دافئة مع وجود جرعة فعالة في الدم؟ ♨️ بيزيد امتصاص الإنسولين بسرعة و يسبب هبوط! الحل؟ قياس السكر قبل الاستحمام!
🔹 تدليك مكان الحقن أو استخدام مراهم بعد الحقن؟ 🩹 بينشط الإنسولين بسرعة! الحل؟ تجنب التدليك أو الحرارة بعد الحقن!
🔹 حقن الإنسولين السريع في البطن و تأخير الأكل؟ 🍽️ البطن أسرع منطقة امتصاصًا! الحل؟ الأكل فورًا بعد الحقن!
🔹 نسيان تقليل الجرعة في الصيف؟ 🔥 الحرارة بتسرّع امتصاص الإنسولين! الحل؟ متابعة السكر و تعديل الجرعات!
🔹 حقن الإنسولين في مكان ساخن (تحت الشمس مثلًا)؟ ☀️ بيزود الامتصاص بشكل خطير! الحل؟ تبريد الجلد قبل الحقن!
🔹 شرب كحول بكمية كبيرة؟ 🥃🚫 كارثة! مش بس هبوط، ده بيدمر الكبد و الكلى! الحل؟ تجنب الكحول تمامًا!
✨ ثانيًا: أسباب مرضية لازم تكشف عليها! 🏥
لو السكر بيهبط من غير سبب واضح، الطبيب ممكن يطلب تحاليل زي:
✔️ وظائف الكلى
✔️ وظائف الكبد
✔️ الغدة الدرقية
✔️ الغدة الكظرية
✔️ تحليل السلياك
✔️ تحليل صورة دم كاملة (الأنيميا)
✨ ثالثًا: أسباب طارئة للهبوط! 🚨
🔹 القيء بعد الحقن؟ 🤢 الحل؟ دهن اللثة بعسل أو عجينة سكر و الذهاب للمستشفى فورًا! 🚑
🔹 إسهال شديد؟ 💩 الحل؟ التواصل مع الطبيب فورًا!
🟧 ملحوظة مهمة! 🟧 بعض الأطفال ممكن يهبطوا أثناء المذاكرة أو التركيز الشديد! الحل؟ متابعة القياسات و تناول كربوهيدرات خفيفة عند الحاجة! 📚🍏
⚡ أعراض الهبوط.. إزاي تعرف إن طفلك بيدخل في مرحلة خطرة؟
1️⃣ أعراض تحذيرية:
💦 عرق بارد (حتى لو في الشتاء)
💓 ضربات قلب سريعة
🤲 رعشة في الأطراف
2️⃣ أعراض خطيرة:
😡 نرفزة وسلوك غريب
🤕 صداع وزغللة
🌀 دوخة وفقدان تركيز
⚠️ وفي الحالات الشديدة: تشنجات أو فقدان وعي!
⚠️ ولو السكر نزل جامد؟
هنا الخطر الحقيقي! ممكن يحصل تشويش في التفكير، عدم اتزان، كلام متلخبط، تشويش في الرؤية، ضعف عضلي، أو حتى إغماء كامل! 😨 ولو ما تمش التدخل، ممكن يؤدي لنوبات صرع أو غيبوبة، وفي حالات نادرة.. الوفاة! 😢
💡 ليه بيحصل الهبوط؟
- جرعة إنسولين زيادة عن اللزوم!
- مجهود بدني غير محسوب (زي لعب كتير من غير أكل) 🤸♂️
- نسيان وجبة أساسية 🍛
- أمراض مصاحبة زي حساسية القمح أو مشاكل الغدة الدرقية.
⏳ معلومة مهمة جدًا للأهالي!
المجهود البدني ممكن يخلي الطفل يهبط حتى بعد 12-24 ساعة!
يعني لو ابنك لعب ماتش كورة أو تمرن سباحة، لازم تقيسي السكر قبل النوم، ولو أقل من 125 مجم، قللي جرعة الإنسولين القاعدي بنسبة 20-30% ⏬
💥 الكارثة الكبرى: فقدان الإحساس بالهبوط!
فيه أطفال بيحصل لهم هبوط من غير أي أعراض!! 😱
يعني ممكن تلاقي الطفل بيتكلم عادي وهو سكره 40 مجم فقط!!
وده بيحصل بسبب تكرار الهبوط لحد ما الجسم يبطل يحس بيه، ودي حالة خطيرة جدًا ممكن تؤدي لغيبوبة بدون إنذار! 😞💔
💊 الحل؟ لازم نحافظ على سكر الطفل فوق 150 مجم لمدة 3 أسابيع حتى يستعيد جسمه الإحساس الطبيعي بالهبوط.
🚑 طب لو الطفل دخل في هبوط شديد أو غيبوبة؟
1️⃣ حقنة الجلوكاجون
2️⃣ في المستشفى، بيتحقن جلوكوز بتركيز معين عشان نتجنب تورم المخ 🚨
🍭 إسعاف الهبوط البسيط في البيت؟
- طفل أقل من 6 سنوات: معلقة صغيرة سكر في مياه أو شوية مربى أو ثلث علبة عصير 🧃
- من 6 لـ10 سنوات: معلقتين سكر في مياه أو نص علبة عصير
- فوق 10 سنوات: 3 معالق سكر أو علبة عصير كاملة.
⏳ بعد 10-15 دقيقة، نقيس السكر! لو لسه منخفض، نكرر الجرعة.
وبعد ما يرتفع السكر، لازم نديله وجبة فيها عيش أو مكرونة أو رز عشان نمنع هبوط تاني (الهبوط الارتدادي)! 🍞🍚
✨ التقنيات الحديثة
فيه دلوقتي مضخات إنسولين ذكية و اجهزة قياس السكر بتدي إنذار قبل حدوث الهبوط.
▪️ إزاي نمنع حدوث الهبوط من الأساس؟ 🛡️
- راقب السكر بانتظام.
- ما تأخرش الأكل ولا تخفّض الوجبات فجأة
- خد الأدوية بجرعاتها المضبوطة
- لو هتلعب رياضة، لازم تزود وجبة خفيفة قبلها
- البس إسورة أو كارنيه طبي إنك مريض سكر عشان الناس تساعدك لو حصل طارئ
📢 انخفاض السكر مش هزار! لو بتتعرض لنوبات نقص سكر متكررة، لازم تزور الدكتور وتعدّل العلاج. حافظ على صحتك، لأن الوقاية دايمًا أحسن من العلاج! ❤️💉
اترك تعليقا